Moin sépa in boug i pran toulézour lavion - moin la zamé parti pli loin Maurice - mé mi arkoné lavion-là i ansèrv anou pa mal La Rénion. Gras lavion dizon nou sé pi in l’il, nou lé kosté sanm lo monn. Sa lé vré pou sat i voyaz, mé ankor plis’ pou tout sat i ariv é mi koz pa rienk domoun , mi kalkil tout bann bistrak modernité, loto anparmi.

Si na pi pétrol dan la lanp, na artonm dann fénoir. San lésans na pi loto, na pi kasalo, sa i vé dir na pi rien pou transport lo bistrak. Mé avansa, si lo pri pétrol i mont, lavion i dsann. Rienk sat lé rish vréman va giny désot la mèr é sra pa la kontinuité téritorial va péy la diférans... San lavion, san bato na pi rien i ariv La Rénion é astèr la manièr nou la fine arivé, koman ni fé pou ansort anou : pou viv, pou trouv in boushé manzé ?

Dopi zordi fo ni pans domin, non sèlman asé ék la gaspy, mé mét osi dann nout tét domin pétrol na pi. Na konét sa. Pou anparé fo ni trouv in ot manièr fabrik lénérzi, mé sirtou fo ni kalkil koman sanz lo monn.

Zistin