Oté

San rode kass z’ot zidol, mé an bréshan ali kant mèm in pé : I parl pi dsa !

Justin / 21 novanm 2019

JPEG - 43.6 ko

Mé zami, zot i koné l’ané k’i vien nora zéléksyon é sé zéléksyonn mèr. A-tor, konm a rézon, i paré la plipar bann zéléktèr i konsidèr lo mèr konm lo pèrsonaz lo pli inportan pou zot. Défoi mèm zot i done lo mèr bann pouvoir li la poin, bann kapasité li la poin, épi in pé i kroi li pé trouv la solisyon pou zot problèm.
Mé zami, mi vé pa kass z’ot zidol mé mi vé rapèl azot kant mèm désèrtènn shoz.

Dabor si mi rapèl bien lé shoz, lo mèr lété lo shèf frodèr zéléksyon dann son komine. Kan lo préfé, dann tan, l’avé vouli sansa li l’avé gingn lé zord, avèk son bann nèrvis li té i bour l’irn. Tout lété bon dann tan la pou fé pèrd bann kominis zéléksyon. Vinn-kat komine, vinn-kat mèr, vinnkat frodèr. Avèk shakinn in troup nèrvis épi lo ronm, épi la vyolans, épi mèm la zol pou bann viktime. Alor si mi di azot mi vé pa kass z’ot zidol, mi brèsh azot kant mèm in pé pars sa sé in n’afèr ni pé pa pass shifon dsi pou éfas tablo.

Aprésa, lo mèr téi fé zéléksyon lo dépité, épi lo bann konséyé zénéro, épizapré konsèye réjyonal... La frode brital la dir in bon paké d’zané é mi pans bann zansien néna ankor sa prézan dann zot tète. Koméla, la frod brital, masiv, lé dizon dèryèr nou é mi pans la pa li va arvnir. Ankor ké i fo zamé di fontène, mi boir ar pi ton lo !
Zordi ankor, dann in bonpé d’ka, lo mèr té lo mèr bann promès, té lo mèr bann kliyan, té lo mèr pou amenn la politik gouvèrnman : in mové l’imaz dann désèrtin ka, in mové zimaz pou détrui si i gingn pars Konm i di : i parl pi dsa ! lé bien nésésèr.