Vantyèr o soir dann télé, moin té apré gard in l’émisyon l’éspor. Té apré anparl in gran zouèr la mark in bonpé bi l’ané dèrnyèr, mé konm di lo kont, sèt ané, son kontèr d’bi lé an pane, é oplis li fors pou marké, oplis li vien pa bou. In psikolog i ésplik, lo boug l’apré domann kosa li ansèrv si li gingn pi mark lo bi, épi so sinp késtyon, li l’apré poz ali toultan, i paraliz ali. Kosa mi ansèrv ? Ala in gran késtyon, é kan la répons i vien pa, l’èr-la zot i pé konprann, tout z’afèr i pé arivé.

Zordi mi pans, mèm si lo ka lé pa parèy késtyonn l’arzan, tout bann moun lo nom lé marké Pol anploi é i oi lo tan pasé san trouv travay. Dé foi in an, dé foi dé, dé foi plis, zot i rod, mé zot i trouv pa : i tir pa d’lo dann rosh ! L’èr-la, zot tèt i travay. Zot nana résponsabilité par rapor zot famiy par égzanp, sansa par rapor zot paran, pétèt osi pou in késtyonn pansion pou z’anfan, épi zot i gingn pa fèr fas. Matin-o-soir, zot tèt i travay san rézilta, konm in motèr i tourn dann vid. Zordi, na plis san-vinn-sis mil pèrsone na poin travay pou in grin. Plis san-vinn-sis mil pèrsone apré poz azot késtyon dsi zot itilité, apré poz azot lo mèm késtyon : "Kosa mi ansèrv dan la vi ?".

Zordi, mi pans galman avèk la kolèr tout sak la tras in kroi dsi in projé té i doi amèn travay dan nout péi. Mi pans èk kolèr bann fosoiyèr nout péi. Mi mazine, sa i anpèsh pa zot dormi. Sa i anpèsh pa zot paradé non pli... Mé sak nana pou sibi in sityasionn shomaz ki fini pi konm sa dirèktoman dan zot vi, sa i anpèsh azot gingn somèy, é zot la poin pou paradé. Si bann shomèr i poz azot lo késtyon "kosa zot i ansèrv ?", bann fosoiyèr nout l’ékonomi, zot i poz pa zot késtyon-la, si tèlman lo sor bann ti-kolon i rogard pa zot, lo sor nout péi non pli… an finn kont, zot lé pa la èk sa.

Justin