Matante Zélida la ékrir Justin :
Mon shèr nové, mon spès salté,
Fransh vérité, mi konpran pa zot, bann rouj-de-fon la ! Mi konpran pa pou kosa zot i di toultan, sé bann Rényoné lé myé plasé pou déside sak i fo pou zot péi, é kan in Rényoné i déside... l’èr-la, la pi bon pou zot. In légzanp ? Koméla, sé mésyé Didier, lo prézidan la Réjyon, donk sé li k’i déside. Donk, i fo zot i aksèp désizyon son majorité i pran. Non va ! Zot lé pa dakor. In légzanp, kan mésyé Didier la déside fé in rout litoral sis voi é, avèk ziste rézon, pa fé lo tram-train, ala ké zot i mète a roproshé, a krétiké, mèm a gaskoné épi a kas lé kui. Mi konpran pa, pars li osi li prévoi in route, épizapré dé voi pou lo train, kan va gagné, in zour. Mi oi pa arien lé pli rézonab ké sa ! Na arien k’zot i trouv sa lé pa bon pou nou. Anplis ké sa, zot lé pa kontan kan lo parti mésyé Didier i fé pa in kont èk zot, avèk toute zot kritikasyon. Lo shien i aboy, é la karavane i pas ! Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Si mi konpran aou, si in Rényoné i pran in désizyon, i fo suiv ali, zyé fèrmé, la min anmmaré, mèm si li déside in bétiz pli gro ké son tète. In légzanp : dann tan Paul Vergès lété prézidan, la sign in z’akor avèk gouvèrnman a Frans pou fé dé z’afèr : in tram-train épi in route litoral pou done lo shoi demoun voyaz an train, an kar, an loto, an vélo... donk in shoi bien larj. Sé pa lo ka mésyé Didier avèk son projé rout litoral sis voi ; m’a dir aou arienk in n’afèr : Paul Vergès l’avé prévi fé lo tram-train an promyé épi la route litoral apré. In rézon ? Sé pou ansèrv bann déblé tram-train pou fé la route litoral ; astèr i fé pi lo tram, mé i fo trouv déblé. L’èr-la i fé in marshé pou dis milyon tone déblé. Déza nou lé an mank, alor koman va fé pou trouv so kantité-la ? Kèl koté i sava gaspiy la natir pou trouv sa ? Défoi moin na l’inprésyon, in pé na poin gran-shoz dan la tète, sof pétète la taye, konm shovrète.

Justin