Yèr gran matin bonèr, moin t’apré ékout in radyo. Sa Rényon Promyèr sa ! Moin pèrsonèl, mi èm bien ékout radyo-la dopi in sèrtin tan. Pou koué ? Pars lo moun i koz fransé, dé foi in pé makot, i koz kréol osi, épi na in manyèr kozé, i diré i pran pa lé shoz tro o séryé. Mi pans galman li na in manyèr ral demoun par son rényonèzté... épi, zot i koné, kan gran matin ou i lèv, l’éspri lé ankor in pé dann brouyar épi ou lé pa paré — sé mon ka ! — pou ékout bann z’afèr in pé tro intéléktyèl, in pé tro difisil pou konprann.

Solman, ala in n’afèr la pa bot amoin ditou. Lo l’animatèr i di a popré : « Ala kosa zot va trouv dan zot bann zournal zordi ! ». Dann “Kotidien”, zot va trouv in l’artik dsi l’amizman d’moun. Dan lo “JIR”, zot va lir in l’artik dsi bann shirirjien. Aprésa, dan mon kèr, mi pans i sava parl “Témoignaz”. Normal ! vi k’na troi zournal i sort tou lé zour. L’èr-la, mi antann in drol zinngèl épi i di l’èr, épi i anons biltin la météo. Aprésa i vien bann z’anons désé... Donk la pa zordi va parl “Témoignaz”.

Si mi di sa, la pa pou fé pityé. Nout zournal i fé pa pityé par rapor lé zot, é pou la konésans, li nana bann problèm. Moin pèrsonèl, si mi vé konprann in problèm a-fon, sé dann “Témoignaz” mi sava rod ali. Mi koné galman plizyèr milyé d’moun i sava tou lé zour dsi internet pou lir zournal-la. Ala kant mèm dé réfléksyon i vien dan mon tèt : inn, mi pèy la taks l’odyovizyèl konm tout demoun, donk mi pans moin na droi sak i apèl in pluralité l’informasyon dan lo sèrvis piblik. Dé, mi rokoné pa Rényon Promyèr lo droi sansir l’opinion konmsa. Ala sak mi vé, épi sak lé kontan, sak lé pa kontan, li pran konstan !

Justin