Si lé vré, ni doi sèye profite tout lokazyon pou avansé ébin mi pans zéléksyon i ariv dann kèk moi, i doizète osi lokazyon pou sèye avansé é si posib règ in pé bann problèm i ral anou an aryèr ziska zordi... Mé, mi antan d’isi désèrtin apré souf dann mon trou d’zorèye. Zot i di amoin : « Oté Justin, la pa ou mèm i di épi i ropète toultan ké lo sistèm kolonyal-sansa néo mé sé topète morète - toultan ni vien pa bou bate sa atèr ébin nout sokl problèm i trouv ar pa in bon solisyon.. La pa ou mèm i di sa épi out parti galman ! Alor si ou i shanj diskour ébin ou lé révizyonis mon pov ga é sa la pa in bon sistèm sa ! »

Fransh vérité, mi di ar lo kontrèr : mi di si ni vé dévlop nout péi, si ni vé fé in mond pli imin ké li é zordi, si ni pé zète nout lankraz pou vréman dann nout loséan indien lé sir ké nou pé ansort anou : in pé i di pa i fo shanj braké, sansa shanj lojisyèl, sansa ankor, sanj modèl é zot néna sirman rézon. Mé si ni pé fé dé shoz akoz ni fré pa ?

Mé zami in pé plis nou noré pi trap nout lotonomi énèrzétik, règ nout problèm sirkilasyon, trap nout sékirité alimantèr é d’ot shoz ankor si la politik la Réjyon dann tan Paul Vergès l’avé gingn kontinyé ali konm k’i fo é pa vèrs dann l’inbésilité la droit la mète anou avèk la konplisité bann gouvèrnman gosh konm droit épi in gran satisfaksyon pou bann kapitalis.

Zordi, mé zami, si ni gingn bate atèr la mizèr, akoz ni fré pa ? Zordi si ni gingnré dévlop inn dé séktèr nout lékonnomi akoz ni fré pa ? Zordi si ni pé fé program la sékirité alimantèr, la lite kont réshofman klimatik, pou in rovni minimome akoz ni sèyré pa fèr ? Biensir san kass lo rin lo néo-kolonyalism ni gingn ar pa fé in mond konm ni vé pou nou ète bien dann nout péi é dann nout loséan indien : sa lé vré mé si i pé aranz dé shoz, akoz pa ? An touléka sé in pé mon l’opinyon zordi, l’èr mi anvoye pou zot mon pti modékri.

Sanz lé soz par plas : In rèv ? In lilizyon ? Sansa in réalité nou na moiyin trapé ?