Astèr si ni arvir in pé déssi Sarkozy, kosa ni romark. Pou l’outre-mèr, boug-la i koné bien sak i fo fèr. La prèv ? Son diskour lo sis novanm 2009. Mi trouv pa in sèl moun séryé pou dir dann kozman-la, l’avé poin bon-bon mézir pou La Rényon. Légzanp i mank pa ! Dévlopman andojène, ko-dévlopman, l’ankadroman par bann Rényoné konpétan, l’otonomi dann l’énèrzi. Solman, lo problèm, sé kan li la fine kozé, bann monopol kolonyal i rant dan la dans é li gingn pa kouraj pou aplik son bann bon mézir. I fo li lé toultan dakor avèk bann kapitalis konprador... sak i vé pa tourn la paj lo kolonyalism (mète néo-kolonyalism si zot i vé, mé sa i shanj pa gran-shoz !).

Pou agrav lo tout, li sé lo prézidan la kass sosyal é sa la fatig bann ti-kolon La Rényon. La pa bézoin mi fé in katalog, pars moin lé sir tout demoun i koné lo mal li la fé anou. Sé pou sa, mi pans i fo li sava l’ané 2012, i fo pi li lé prézidan La France. Ni pé di a li, a popré sak bann révolisyonèr arab i di : " l’ané 2012, Sarko dégaj ! Plito, Sarko, bar aou !"

Justin