Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Sarkozy dann télé : La fot bann Rényoné i fé tro z’anfan !

vandrodi 6 avril 2012, sanm Justin

Vant-yèr o soir, moin la bien ékout Sarkozy dann télé. Pou kosa ? Pars a s’ki paré, li té i doi anons bann mézir for pou bann péi l’Outre-mèr. In pé té i parl mèm in plan pou La Rényon. Kan li té fini, kan lo dé zournalis té fini èk zot késtyon, l’èr-la moin la fini par konprann na poin lo plan pou nou, na poin l’avnir pou nou si bononm-la i ropas prézidan pou sink an ankor. Pars, sanm pou moin, la fine sèk dan son tèt... na pi z’idé ladan.
Lé vré, li la di li lé pou l’otonomi énèrzétik, mé an parol ! Pars pandan sink an, li la kas, sansa li la èd kasé, sansa ankor li la lès kas lo plan Paul Vergès l’avé mèt an plas kan li lété prézidan la Réjyon. In plan té i doi aport l’otonomi énèrzétik, dévlop l’anploi, épi, sak lé pli inportan, anbrèy nout dévlopman ékonomik... Li lé pou lo dévlopman andojèn, mé nou la fini konprann, sak li vé, sé lo DAO- démèrd aou tousèl, èk sépa konbien shèn dann pyé. Li di osi li lé pou lo ko-dévlopman, mé li parl tourism : bonpé tapaz, bonpé dépans pou tré pé rézilta.
Kan lo zournalis i domann ali ékèl mézir for pou bann péi l’Outre-mèr, li komans par di sa lé tèlman for ké ziska zordi pèrsone la pa mazine in n’afèr konmsa. Té kosa d’apré zot ? Lété ankor in kou pou siprime bann kotizasyon si ou i anbosh demoun. Zamé fé ? I vo myé antann sa ké èt sour, pars sé sa mèm i fé, é dépi in bonpé z’ané. San rézilta biensir.
A par k’sa, solon li, batiman i done lo grin. L’ilétrism i rokil mèm si, sanm pou moin, bann shif i bouj pa, i mont i dsann, i mont i dsann ; La fot kisa si bann voiyan lé dann rouj ? La fot kisa si dann zournal la Frans i di nou sé lo réjyon pli pov ? Akout amoin bien : d’apré Sarko la di dann télé, sé la fot Kréol i fé tro z’anfan*. Boudikont, sé la démografi k’i ral anou déyèr. Konm di lo kont, nout poin for sé nout poin fèb. Pa bann monopol, pa bann group déor k’i mèt la présyon. Pa nout dévlopman k’i patine.

NB : Solon sak li la di, i fé dé mil anploi shak ané pou bann jèn, mé nana uit-mil shak ané i ariv an az pou travay. Donk na tro z’anfan !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus