Moin lavé pa di a zot...! gouvèrnman-là i rod souk tout bann shomèr é fé port azot le shapo. An fonksion la morù, sétaki i rod batt son travay atèr. A oui...! Si nana shomaj, dawar sa la fot bann demoun i rod travay...

Lo 21 zilié dèrnié, gouvèrnman la pran in dékré pou fé kontrol bann shomèr. Lo dékré la sorti vandrodi dèrnié é la fine rant an apliksion. Dorénavan, nora inn komision pou vèy si bann shomèr i travay pou rod travay. Sinon i puni a zot. Le scoop !
Sé bann préfé shak départman i diriz le zafèr. Mi éspèr pa va rant konm dann tan Perreau-Pradier. Sa la, inn ot zistoir.

De Villepin, lo Premié minis, i angant son minis lanploi, Gérard Larcher, kontinié son lariaz desù la konsians. Le shomèr lé kom i rass i fo kùlpabilizé.
Poitan, son sitùasion la pa son fot. Parlfèt, sa lé jùs in manièr rod le pou dan la tèt sat la poin. Èk tout zot formùl intélizan, zot 100 jour pou fé la diférans, lanploi la rèss sù palié. La pa aranj gran shoz. Soman, zot i pèrmèt azot koup bann zalokasion shomaj "à titre provisoire". Lasédik va port in gran rèsponsabilité.

An gro, loi-là i done le droi Léta atak la dinité demoun. La p’asé i pèrd travay, i fo done alù traka. Parss, si la koup zalokasion in shomèr, koman lù pèy loiyé, manjé, bann sharj, tousala ? Lé vré, èk gouvèrnman-là, larzan i trouv sou galé. Anou-là, pa loin lansé.

Zistin