Matant Zélida la ékrir Justin :
Mon shèr nové, mon spèss salté, rouj-de-fon dopi l’étèrnité konm ou di souvan dé foi ou mèm, sé o pyé d’lo mir k’i oi lo mason é lo pyé d’lo mir sé zistoman kan i ariv konm i sa arivé i n gran ronouvèlman. Sépa si ou la bien romarké, la plipar d’kandida i prézant azot lé san zétikète. Lé kiryé in n’afèr konmsa ! Ou killé bann rouj ? La délavé.zot osi zot lé dsi bann list « san létikète » ! Pétète sa i vé dir zot osi zot i ronyé zot létikète, sansa zot i pans létikète i pass pi. Mon nové, sé sak mi di toultan é zordi konm i si nou néna la prèv moin néna rézon. Mé antansyon zot i pé avans maské mé promyé kou d’van é lo mask i sava. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, fransh vérité ou néna in fason lir i apartien aou tousèl pou vréman. Non ! Final de kont i apartien tout inn bann « san konprann ». San konprann lo tan d’zordi la pi lo tan d’yèr. San konprann nout zidé ofiramézir l’apré prann lo dési par rapor bann zidé néokolonyal. San konprann lo bilan ni prézant dsi la Rényon zordi, pé z’a pé, i gingn léspri d’moun. Sirtou lidé nou lé dann in sosyété idéal, sé in kékshoz apré pèrd la rout, in lidé k’i pran lo fon.
Alor ou i konpran bien mon vyé matant nout lidé d’linyon sé in lidé k’i avans konm i di k’i gingn térin san ké ni mète sansa ké ni tir sak ou i apèl nout mask… Astèr vi koné bien nout parti la touzour vouli fé l’inyon dann la popilasyon pou réaliz in program : sa té vré yèr, sa lé vré zordi, é sar vré ankor domin. Fé l’inyon avèk nou-sa i vé pa dir aral tout la kouvèrtir pou nou tousèl. Sa i vé dir tout sak i fé l’inyon i marsh avèk son prop sansibilité dann mèm diréksyon dann lo réspé lé z’inn pou lé zot é sa, sanm pou moin, sé in bon prinsip. I vo myé an touléka ké l’izolman.
Astèr, i pé dir partou i fé pa parèye é sa lé bien vré. Bann kamarad shak landroi i fé zot l’analiz épi i propoz zot solisyon : Bon ? Pa bon ? Domi bon ? Sé a la fin k’i kont, ou i pans pa ? Avèk konm in prinsip pou fé avansé : fé gingn La Rényon épi fé gingn lo parti rényoné.