Mésyé, médam, La sosyété koz èk moin sé koz èk in kouyon mé sé o pyé d’lo mir k’i oi lo bon mason. Mézami, kozman moin la mark an-o la, mi sort trouv ali dann in zoinal i port dsi laktyalité é mi doi dir sé in n’afèr la poz amoin késtyon. Pou kosa ? Pars dé foi kan i di kékshoz, si ou i rèss dann bann zénéralité, ou néna l’inprésyon ou i aprosh vréman la vérité ziska toush ali avèk lo doi, mé kan ou i aprosh in pé pli pré, kan ou i sava rode dann lo détaye sé la ké ou i apèrsoi la roul aou dann la farine, la fé kroir aou blan pou noir, makaroni pou la bouji. Koman in n’afèr konmsa i pé arivé ? Pli fasilman ké ni pans. Na poin arien i rosanm plis la vérité k’in mansonz bien préparé, si tèlman bien di, sansa bien ékri ké li fé pans aou k’i di la vérité. Mé si ou i suiv poin an poin, si ou i rofléshi tout sak i di mèm si lé pa fasil souvan dé foi, ou i apèrsoi lo lérèr, plito trafikaz la vérité. Lérèr, konm la mansonjri lé dann lo détaye. Landroi ni di i fo alé rode lo dyab.. Alé ! Mi kite azot rofléshi la dsi é ni artrouv pli d’van. Sipétadyé.