Bann Madégaskar, konm malérèzman près in miliar d’moun déssi la Tèr, na in problèm i rann azot la vi dir : sé koman ranpli, kansréti in pé, zot bouzaron... Biensir la pa zot sèl problèm, mé sète-la, sa i fé pliské mal...

Poitan la tèr pou planté nana an kantité. Bin alor, pou kosa k’i plant pa ? Moin lé sir, in pé la fine trouv la répons : va di, bann Malgash lé parès.
Sé in répons k’i vo son poi la taye lo shyin. La pa zordi, la pa démin, mé nou nora l’tan anparl la-dsi.

Donkalor, i fo mète la tèr an valèr ! Mé koman ? Sirtou pa konm moin la lir par-la. É lé ga, lé tèlman inkroiyab ké moin l’apré domandé si moin la pa apré ramas mantèr : pars i prétan dir, gouvèrnman la loué la tèr in sosiété i sort la Koré po plant mayi, soza, léguime. In gran karé siouplé : plis sink foi La Rénion. Pa pou dé zour ankor : pou 99 zané. Pou fé koué ? Transporte la prodiksion dann la Koré.

Bann Malgash, kosa va fé ? Zot va trimé po gingn in boushé manzé, mèm pa asé pou ranpli zot vant épi sète zot famiy.
Lé vré, lé pa vré ? Si lé vré, sé kaziman in krime kont in pèp. Si lé pa vré, pardon éskiz !

Justin