Lé sir ké lé pli fasil rash ali kan li lé pti kisoi in korbèy d’or, in sapan, sansa in pyé d’zépinar sansa in n’ot kalité z’épine. Pars kan li lé fine grandi, son zépine lé gran, son rasine lé bien pri dann la tèr. Donkalor lé dir rash ali : ala pou son sans prop ! Astèr pou son sans figiré : zot i pans pa i fo siprime in danzé kan li lé pankor bien grav. Pars si ou i lès ali fèr, li domine aou é ou i pé pi fé arien po siprime ali. Sa lé vré osi kan na in poizon i mine in sosyété : sé kan li komans k’i fo atak ali. Si ou i lès ali bien instalé, tro tar mounoir ! Na pi arien pou fèr ! Kosa zot i anpans ? arien ditou ? Fé travay z’ot koko ! Fé bouy z’ot matyèr griz ! zot va oir, k é rant-rant, ni pé z’ète tazantan dakor rantre nou.