Mézami mi koné pa si zot i souvien fèrblan demoun téi sava rode dolo ansanm… Mwin la bien konète fèrblan : sa té in réssipyan néssésèr pars koman alé rode delo si ou na poin. Mi rapèl in madam in pé kosto, téi porte troi fèrblan plin an mèm tan : inn dsi la tète, lo dé zot dsi zépol édé par in boi téi pass dan l’anse lo fèrblan inn dovan é l’ote déyèr. Néna èl solman téi gingn fé sa dann boi d’nèf pars sa i fé soisante kilo o moinss san konté l’ankonbréman. Anplis èl té i yinbou porte sa an kadanssan dsi shomin. Toute fasson, kissoi inn, kissoi dé, kissoi troi, i fo prépar la rolève kan lé ankor bon épi pa tro atann lo tan i fé son l’ouvraj. In bon zèstyon dolo té i rand sa obligatoir si wi vé pa rotrouv aou san lo. Mé zot i koné sa lé konm in pé toute zafèr konm lo gaz, konm soulyé, épi d’ote shoz : gouvèrné sé prévoir sof si ou sé in mové gouvèrnman. Mi akiz pa pèrsone mwin-la, mé mi panss kant mèm inn-dé... Alé ! mi kite azot rofléshi la dsi é ni artrouv pli d’van. Sipétadyé.