Sé koi la bone santé ? Mi di pa pars zot va konète !

26 zwin 2015, sanm Justin

Zot i koné kréol koman i lé. Kan ou i domann nouvèl, i réponn aou : « Ptit Santé ! ». I fo dir lo mo « pti » sansa « ti » i sort souvan dann nout boush, mé alon rès dann domenn la santé.
Kosa i vé dir kan ou lé ann bone santé ? Pou bonpé d’moun, sé kan ou na poin in maladi doktèr i koné. Tansyon lé bon ! Koléstérol lé vayan ! Lo zyé, lo dan, lo bra. Tout morso lé daplon. Tout lé dos ! Donk doktèr i pé dir aou, suivan sak son bann liv i di ali : « Ou lé pa malad ! Donk ou lé an bone santé ! ». Bon pou sa mèm !

Mé moin la antann dann in télé in définisyon la sékirité siosyal, dann promyé tan la mète ali an plas, té i done dsi la bone santé : dabor ou lé pa malad dann out kor, apré ou lé bien dann out tèt. Troizyèm z’afèr, ou lé bien an parmi l’moun… Sa sé troi z’afèr, mé zot i konpran bien lé troi i doi marsh ansanm si ou i vé ète an bone santé. Si na inn i klosh pa, lé sir li va gate lé dé z’ot.
In maladi, sa i sap out moral épi ou lé pa bien an ou mèm, pou arshévé out rolasyon avèk lé zot I gate osi. Si ou lé pa bien dann out tèt, lé dé z’ot z’afèr lé ataké. Si out rolasyon an parmi l’moun lé pa bon non pli i afayi aou dsi lé dé z’ot poin…

Astèr i fo mète tousala an armoni, mé koman i fé ? Mi dir ar pa zot pars moin mèm mi gingn pa épi si mi di zot va konète konm di lo kont !

Padport

Signaler un contenu

Inn modékri, inn ti lavi, inn komantèr ?

Bann modékri andann forom

  • La santé i raproch domoun, malerezman li éloign ou byn sé domoun i éloign ossi, la" sosiété rynké pou moin toussel" y aranz pa lo zafer ditou. zot la kompri la solidarité lé in zarboutan pou la santé ossi.
    in mo si lo kate vital , li lé mié traité ké lo patyan si mi pé dir, oussa nou sa va, toulemoun la entendi ké sertin professyonel té vé pa tyers payant, koman soyne out santé, si lo morsso katt y pass avan lo malade ?


Témoignages - 80e année


+ Lus