Mé zami si ni kalkil bien, mi pans nou lé dann in drol démokrasi : nou lé konfiné par raport lo covid 19, in maladi na prèss poin isi. Prèss poin ? Oui, dopi la komansé néna 390 ka é anplis ké sa néna désan trant nèf pèrsone la fine larg ali an plan. Arzout èk sa, pa in sèl mor é troi pèrsone mi pans banna la fine obliye azot dann lo réanimasyon.

Si i rogard lé shoz konmsa, an gro, san alé dan l’fin : 90% bann ka lé inporté, é lo dis pour san réstan par l’fète i di sa bann ka lokal mé san z’ète sir pou vréman. Sa la pi in lépidémi. Konm i di sa in rèss la mikrobi-konm néna in shanson téi i di sa dann tan la polio.

Donk nou lé fèrmé dann nout kaz pou in réstann maladi. Nou lé fèrmé pars in mèr patri lé laba dann ki d’dyab la désidé. Ni pé pa alé koifé : in pé mi oi dann shomin la fine ariv poète ziska si tèlman shové lé long. Bann l’antropriz l’apré kapoté. Pli pir, kan ni sort in pé an déor ni pass nout tan pou évité. Mé pou évite kosa ? In l’ènmi invizib, talèr in l’ènmi inégzistan !

Zot i koné listoir dann tan demoun téi rakont : listoir in madam la pass son sète zanfan luil tantan pars inn lété pa bien gayar dann ta. Dann désèrtin landroi i fé pa konmsa. Rodrig, avèk Agaléga, konm lil Moris lété konfiiné-Moris lé ankor, mé dopi kinz avril Rodrig avèk Agaléga lé pi. Lé normal ! Lamaladi la fine baré ! Alor pou kosa i fé pa parèye isi La Rényon ? Pars dann d’ot péi lé in pé pli klèrvoiyan ké dann La Répiblik fransèz.

Astèr kosa banna i lans ? I lans in rimèr konm de koi demoun la prévi alé manifèsté lo zour va dékonfiné. Pétète pou sa I zoué anou so tour d’makotri la. Nou l’apré pèye pou d’ot nou la ! Pou in maladi si l’avé ékout anou téi pass mèm pa La Rényon. Mèm pa lo tan in pti léskal.