Oté, ésplik a mwin konm zot i vé, ral isi, ral la ba, mi konpran pa so sosyété ki si tèt la, so sosyété an ki d’bol konm i di, défwa li lé aranzan èk désertin é mandoné pou dot lo kèr lé larz konm in fèy lo tin. Pétèt zot va di a mwin, li na lo drwa, vik li travay pou sa, pétèt va di ankor li la fé gro zétid pou sa, oila poukoué zordi li na lo drwa kapar tout mé, minm sa, oplis i ésplik a mwin, oplis mi konpran pa. Dopi dé trwa zour dann télé dann radio i an parl.

In dirizan gro lantropriz la ba déor i poz son démisyon pou kit son lantropriz pou artrou in ot. Li na lo drwa si li san lo zèrb lé pli vèr dan la kour son vwazin, mé konm i di, li la rorganiz a li, manièr gingn kok shomin èk lo takon larzan lantropriz. Fasil pou li, vik sé li lo patron, li la byin drèss lo bor bann papié, pou byin ansèrv a li. Inn dan lot i di va fé, 14 milion zis pou li. In travayèr, in zouvrié kèlkonk kan li démisyonn, li sava ryink èk son vié linz. Lo minm i di, avan alé la mèt do lord, dan lantropriz.

li la siprim 10000 anplwa an dé zan, ryink pou la frans néna 600. Minm tan mi antan touzour dantélé èk radio, mi antan i di konm sa, oilali-oilala, lo kod di travay néna la pousièr dosi, lé 35 èr i donn bouton désertin, lantropiz i avans pi ni dovan ni déryèr, sépousa ni domann in lèd gouvérnman. Mwin la antandi, in syndikat domann lo boug “An awar in pé lélégans, pou rofiz lo larzan“. Mé baya, domann in shèf gro lantropriz an awar lélégans, sé konm si i domann in poul an awar dé dan !