Nana dé moi é dé moi, dann plizyèr konférans do près Paul Vergès la anparl l’égalité réèl pars sa sé in prozé lo gouvèrnman fransé pou lo vin-t’an k’i vien. Lo bann résponsab nout parti, pou z’ot par, zot osi la diskite dsi l’égalité réèl, mèm zot la fé propozisyon… Bien sir ké oui ! Mé pétète zot na poin konésans ? Sa sré pa pou étone amoin pars lo bann gran média, dopi in bon bout tan, la mète nout kominikasyon dsou l’étoufoir é afors étoufé zot mèm la pa shèrch a savoir kosa i lé, dopi kan désèrtin la dévlop so pansé, é kosa sa i avans anou osinonsa i avans pa nou...

Si tèlman ké kan la nonm inn sékrétèr d’éta pou l’égalité réèl in pé la di sé in madam inkoni pou in program inkoni. D’ot la di sa in tak-tik pou prépar z’éléksyon Prézidan la Répiblik. Sétaki la pans sa in gadzète avèk Hollande konm inspéktèr. Nana mèm la di sa sé pou amiz la galri… Poitan lé pa difisl romark La Frans sé in péi nana bonpé z’inégalité é siprime lo z’inégalité i pé z’ète kékshoz bien nésésèr-sirtou po nou dann l’outre-mèr. A moins ké sak i ékri, sak i koz, zot lé pou l’inégalité kansréti pou pa partaz lo gato rant toulmoun é shakinn son par : pa in gro par pou in minorité nana lo pourkoi, la farine gato pou sak lé konm job dsi son ta fimyé.

Sak i fé travaye mon tète sé ké nana soisann-dizan la loi départman fransé la pasé é l’égalité, mèm si nou la bataye pou sa, lé ankor loin pou arivé-mèm ké lo l’ékar rant lé z’inn é lé z’ot i arète pa rogoumanté. Forsé, l’arzan i apèl l’arzan é sak na l’arzan li lé antréné pou vid la loi par l’intéryèr é sak i kroi lo mirak l’arivé li mèm i rès a-tèr.

Tousa lé vré mé pou kosa ou lé zournalis si ou i gingn pa asplik out léktèr kosa i lé l’égalité réèl. Nana plizyèr moi ni anparl dé sa ! Donk sré pou sa ké samdi lo pli gran zournal i mète konm tit : « Sé koué ankor so l’égalité réèl ? »

NB-li la ékri dann fransé mé in kouyonad an fransé konm in kouyonad an kréol i rès in kouyonad, é sak i di dé kouyonad sé in kouyon si mi tronp pa.