Mi pans zot i koné Rodrig ! Lé vré k’i anparl pa tro souvan péi-la isi La Rényon. Mé i anparl kant mèm. Kansréti kan nana in siklone l’apré rondé par koté nou, dann nout réjyon l’oséan indien. Kansréti ankor kan i rouv i lign l’aviyon pou gingn alé bate karé la-ba. Kansréti ankor kan i ariv azot in gran malèr konm la fyèv aftèz, sans ankor in gran déga siklone.

Bin figir azot Rodrig nana in éstati l’otonomi dann la répiblik Moris dopi 2002 don la gingn son katorzan l’otonomi dopi lo 12 oktob sète ané. Lo péi la pa bien gran : 109 km2 avèk In lagon-résif si zot I vé-troi foi pli gran ké lo péi par li-mèm. Nana par-la 35000 pèrsone i abite la-ba. Lo péi nana in prézidan i apèl in shèf komisèr, li nan in l’asanblé pou roprézant son popilasyon, li nana la posibilité fé bann loi épi bann règloman pou alé dann sans la popilasyon i vé alé.

Sé konmsa ké banna la aboli bann sashé plastic é sa sé in bone afèr pou zot. Sé konmsa galman banna la fé in règloman pou protèz la popilasyon z’ourité. Alé oir, nou, shé nou, ni ariv mèm pa pou protèz nout popilasyon bishik avèk boush-ron. Sinploman pars la-ba bann i pé fé lo bann loi épi règloman ké isi nou vien pa bou fé.

Sé l’èr ké Didier Robert i rann in vizite banna é pa n’inport ékèl zour mé lo zour la fète l’otonomi. Parol bann skout, ala in n’afèr i mérite ni port atansyon vi nout pasé anou, vi lo bann lite la fine améné isi La Rényon. In vizit konmsa, sa i pé pa z’ète inosan san pour san é mi pans i fo ni fé travaye nout tèt in pé la dsi ssé sak nou va fé.

(La pankor fini)