Napoin lontan, moin la antann in moun té i di konmsa : la lang kréol lé pov, késtion n’vokabilèr.
Pou moin li té vé dir, pou in moun bien instruiyé konm li, napoin asé mo dan la lang kréol pou an aoir in kominikasyon konm ki fo. Pou mon par, mi pans plito la pa akoz in moun i koné pa toul’bann mo nana dann in lang, sé la lang l’otèr. Sé son lignorans l’otèr !.

Nana bonpé lo mo dan la lang kréol : sansa koman Alain Armand, Baggioni, Chaudenson nora niabou fé zot diksionèr.
É pi shak zour bondyé i done la lang i vien pli rish : kisoi avèk bann mo fransé i gingn zot droi rantré, kisoi avèk bann fo-zami i sort dann in lang épi i rant dann kréol avèk in n’ot sans, kisoi bann mo i sort dann zournal. Ni dizèr sa, vèy pa !

Lé vré lo kréol laté touzour in pé bordé, li lavé poin lo droi rant lékol, épi d’apré inn-dé, té fé pa séryé koz an kréol sï zafèr séryé. Soman in bon pé rant nou, la travay an maronèr pou donn la lang kréol la plas i mérit ali. Oplis li mèt son né ousa li lé pa, sé plis li anrishi son vokabilèr !
Konm di Darwin : « sé la fonksion ki kré lorgane ». Sa lé vré pou vréman !

Justin