A bon ! Dann in gran péi kom La Frans, rish konm sa i lé, é kulturé an plus, é k’la invant lé droi bann moun. Déssèrtin lé blizé fé in zourné par raport nana tro marmay i boir bouyon dann lékol ! Sérié : la pa Jules Ferry, in minist La Frans, la invant linstriksion piblik, la pa li-mèm la di lékol i doi ète laïk, gratuit, obligatoir ? Alors, kossa l’arivé don ?
La pa larzan pars a s’ki prétan dann bidzé La Frans nana in bonpé miliar pou l’édikasion nasional. La pa lo bann amontrèr, pars sa in bann profésionèl, bien instruiyé, nana éstaz par déssi éstaz, épi nana mèm in gran lékol i okip z’ot formasion... La pa non pli léspérians vik linstriksion piblik i dat plis in sièk.
Poitan, i prétan, dann désssèrtin kartié, kan lo mètr i poz in késtion, kan i donn in dovoir pou fèr, épi bann lindikasion k’i sava avèk, nana arienk kinz marmay déssi san, i konpran toultan sak i di azot, soixant-troi pou san dé foi i konpran, dé foi i konpran pa, épi vinn-dé pou san i konpran pa arien, zot lé dann fénoir total (1).
Kossa sa i vé dir ? Alor i koz pa mèm langaz, sansa l’amontrèr na poin assé lo tan pou bien fé konprann ali, sansa la sosiété lé pa la èk sa... Mé, oussa ni sava, si lo ministr li-mèm (2) i kroi ankor marmay lékol matèrnèl i mète koush ?
Konm di kréol sé li k’nana inn koush, dann son tèt pa oussa k’zot i koné.

(1) Sa in sondaz sérié
(2) Sa Xavier Darkos, sa !

Justin