Matant Zélida la ékrir Justin :

Mon shèr nové, mon spèss salté, rouj-de-fon dopi l’étèrnité, mi pans zot i koné pa vréman kossa i lé kann. Si wi konétré konbien foi, kan mwin té i travaye dann kann, mwin la modi so kann-la. Konbien foi mwin la souète i fini avèk son rass : mi modi ali pou son divé i rant dan la shèr, mi modi ali pou fourmi rouz, gro konm ti, i pik domoune ziska lo san. Mi modi ali pars mwin la zamé gingn mon vi ladan, mi modi ali pars néna arienk bann plantèr épi bann kapitalis la viv la dsi é la plipar d’tan avèk sibvansyon. Si in zour mi oi la fin d’lo kann, mi romèrsyé Bondyé, mil foi. Pran sa pou toi !

Justin la fé pou répons :

Mon vyé matante k’ i koz toultan la boush rouvèr, out kozman la pa pou étone amwin ditou. Mwin la fine antann sa in gran kantité foi é la pa pou sa mi sava done rézon toute bann kozèr pou anpèsh la boush santi mové.

Final de kont lo roprosh wi adrèss noute kann, sanm pou mwin sé plito in roprosh wi fé lo sistème lésploitasyon ni viv dodan é pa arienk zordi, mé an tou tan... wi parl késtyonn divé mé divé sa néna lontan. Mi jur aou, néna lontan mwin la pankor antande in n’afèr konmsa.

Wi parl fourmi ébin matante sré bon ni poz anou lo bon késtyon la dsi. Lé vré koméla, in pé partou, néna fourmi kissoi dann karo kann, kissoi dann karo in pé tout zafèr. I fo ni domann anou sèryèzman, si la pa lo bann médikaman shimik, si la pa l’angré, sansa lo dézèrban lo sistèm la fors anou pran i la pa provok so linvazyon fourmi. I fo ni domann anou si la pa pa lo sistèm plantaz la dézékiib la natir si tèlman ké fourmi épi d’ot tablatir l’apré anmansh anou. Kalkil bien !

Astèr wi parl sibvansyon, mé lo sibvansyon, wi panss vréman sé pou fé viv bande plantèr sansa pou angrèss bann sosyété kapitalis : pou fé ashté tout zot salté d’produi, pou andète bann plantèr é anpliské sa mète azot dsi lo bor lo kapotaz ékonomik. Kalkil bien ou va oir si la pa sa !

Tok ! Pran sa pou ou !