Mé zami, si sa i déplé pa zot, ni pé parl in pé dsi la solidarité avèk nout grann voizine Madégskar. Moin pèrsonèl, moin la fine ékri é pa arienk in foi nou la prèss zamé fé l’éfor k’i falé pou ède in pé nout grann voizine kan èl té, kan èl lé dann difikilté.

Si ni oi l’avnir La Rényon dann loséan indien bien konm k’i fo, ni doi oir l’avnir dann la kopérasyon dann l’oséan indien épi natirèlman avèk in péi gran konmsa rish avèk son bann promèss dévlopman. Si in pé i di nout l’avnir i pass pa par la kopérasyon avèk Madégaskar, mi pans banna néna tor. Ala in péi gran konm La Frans+ La Belgique, avèk in ta épi in paké rishèss natirèl, avèk san tardé karant a sinkant milyonn moun é ni diré nou lé pa la èk sa.
Ni diré nou na poin arien pou fé avèk in péi konmsa. Nout ka sré sèryé zot i pans pa ?
Si nout l’avnir lé prinsipalman dann loséan indien, li lé avèk bann péi l’oséan indien é an parmi li lé avèk Madégaskar san obliye lé zot péi kisoi bannzil sèr, kisoi bann péi kontinantal konm sète L’afrik dé l’est épi bann péi lo kontour loséan indien. Si sé pou n ou prépar in bonl’avnir pou nou mi oi pa koman Madégaskar i kont’ré pou nou konm la po patate.

Solman si ni di : ni doi ède Madégaskar pars sé nout fote prinsipalman si èl lé dann l’éta k’él i lé zordi avèk son l’inkapasité pou défann aèl kont bann zaléa klimatik, moin lé pa dakor ? La pa akoz moin, akoz lo pèp rényoné nout grann voizine lé dann l’éta k’el i lé zordi. Mi pé pa dir, nou rényoné sète avan-yèr, sète yèr é pétète galman sète zordi ni port pa in résponsabilité dann sète afèr-la, pars lé sir ni port in résponsabilité. Lé sir nou néna in dégré d’résponsabilité dann sète afèr-la.
Si i di nou néna in dogré d’résponsabilité dann sète afèr-la mi pé ète dakor, mé siouplé alon kalkil nout résponsabilité. Pa bézoin ni tap dsi nout léstoma an dizan : « Sé ma fote, sé ma fote, sé ma tré grann fote ! ». Non, la pa nou l’otèr prinsipal dann sète afèr-la !