Zot i rapèl moin lavé komans parl a zot in liv Claude ALLEGRE.
Lu la ékri sa an 1990 ; a moin mi lir 24 tran aprè !
Li dékline sa an plizir zafèr, na 10 sapit ; a sak foi li poz in problèm, a nou réflési si nou lé dakor ou pa, konm li lé in siantifik mé osi in angazé politik, li pé pa ékri ninport koué é aksèpt ninport koué an partikilié dé zékolozis ; anfin li mèt an déba ; a nou d war koué nou pans.

La Tèr lé menasé, vré ou fo, dan kèl mézir, fo dramatizé ou pa !?
Na la polisyon, bon bin koman i fo fé po o moin diminié.
Lozone parey, lé par androi ; na moyin bann zindistri fé moin dioksid karbone, par égzanp po produi ki polu, itiliz lésans san plon, mé la falu batay èk résponsab ékonomik, politik, dé zané !

Lo, kab manka nou ; atansyon nitrat, fosfat i dsann dann nap fréatik.
Arèt zèt tout dan loséan, sa la pa in pirifikatèr infini… koté oséan pasifik, nana in ta salté i flot, na si tèlman oui kroiré in 7éme kontinan ! Va tié nout zanimo marin (torti, dofin, zoizo).

Lom i modifi pa lo klima plis kin gro eksplozion volkan lisland ; bon, lom sé in animal konm ninport a kèl ; lès a li viv ; fo osi li manz, li respire, li konstrui son kaz, li déplas… Ti pé pa anpès in Afrikin (ou in haisiin) bril in bout boi po fé kui son diné oté !
I fo invant lékolozi po lé vil osi ; lékolozi sé in lékilib ; in dévlopman dirab. Sa i konsern pa in péi solman ; i intérès toul moun si la Tèr antièr.

Fodré minm ke lé pli gran polièr sé lé pli gran payèr ; mèt in lamann ; èk so larzan, fé ankor la rosers po amélior ankor lo zénétik si i fo ; invant in organis vivan ki siprim la polisyon.
Lo : ninpé i gaspi tro(loNor), dot i kont gout par gout (lo Sid) !
Ekonomiz …pétrol, sarbon, uranium, tou sa la, sa lé pa inépuizab !

Justin