Kan ou i gingn pa konprann in n’afèr an kalkilan avèk la tète, ou i préfèr alé rode bann zésplikasyon la pa rézonab. An parmi ou lé a d’mandé si kèlk’in la pa apré zoué avèk lo sor. Ou i pé, si ou i vé apèl sa galman fanafout, sigidi, sansa d’ot nom ankor. Dann zistoir l’amour, lé pa rar désèrtin i pans zot té amaré. Amaré ? Oui ! Sa sé kan ou i kroi la volonté in moun lé abatu pars ou i konpran pa koman out fiy, out garson sansa out madam la parti tonm dann bra in moun i mérite pa zot. Pou in n’afèr konmsa ou i pé marsh la nuite, fé la priyèr dann in rolijyon la pa la v’ote, dépans out larzan, mé zamé ou i sava pa agard si lo poinn féblèss la pa dan ou mèm, sansa dan la pèrsone la fé kapaye aèl san rézon solon ou. Konm i di : lo kèr néna bann rézon, la rézon i koné pa. Alé ! Mi lèss azot rofléshi la dsi é ni artrouv pli d’van sipétadyé.