Kan wi gingn pa konprann in n’afèr an kalkilan avèk la tète – la rézon si zot i vé ! – wi profère alé rode bann zésplikassyon dann lo pa rézonab. An parmi lo bande zipotèze wi mazine, ou lé a d’mandé si kèlk’in la pa apré zoué avèk lo sor konte ou… Wi pé, si wi vé apèl sa galman fanafout, sigidi, léspri lo mor, sansa d’ot nom ankor. Toute fasson sé dé shoze ké lé pa rézonab.

Dann zistoir l’amour, lé pa rar déssèrtin i panss zot té amaré. Amaré ? Oui ! Sa sé kan wi kroi la volonté in moune lé abatu pars wi konpran pa koman oute fiy, oute garson sansa out madam, sansa ou mèm la parti tonm dann bra in moune i mérite pa zot.

Pou in n’afèr konmsa wi pé marsh la nuite, fé la priyèr dann in rolijyon la pa la v’ote, dépanss out larzan, mé zamé wi sava pa agard si lo poinn féblèss lé pa dan ou mèm, sansa dan la pèrsone la fé kapaye aèl san rézon solon ou.

Konm i di : lo kèr néna son rézon, ké la rézon i koné pa. Alé ! Mi lèss azot rofléshi la dsi é ni artrouv pli d’van sipétadyé.

Justin