Matante Zélida la ékrir Justin :
Mon shèr nové, mon spès salté. Ala pa k’bann gran shèf rouz la kalkil in n’afèr bien insignifian : a s’ki paré zot i prétan fé marsh bann loto èk kouran la limièr... Kan moin la rakont sa mon bann kopine troizièm az, na inn-dé la pète un rire. Nana inn la di konm de koi kouran la limièr lé danzéré : la prèv, si ou i mète in pti pointe dann lo priz i fé sote aou baba ! Mazine in pé, i éléktrokite in kou bann pasazé dann loto ! Touléka, moin pèrsonèl, mi koné pa kossa m’a fé kan bann loto konmsa v’arivé !

Justin la réponn aèl :

Matante, siouplé ! Ala ankor in nouvo z’afèr k’i grandi out roiyome la kouyonis L’ésans, ou la pa pèr ? Gazoy ou la pa pèr ? Lalkol, pétrol, tousa-la ou lé an konfians avèk ? Sa lé pa danzéré ? Poitan sa i flanm sa, sa i bril vèr-é-sèk... Sak i fo, sé bien gingn kontrol so lénèrzi-la : kisoi kouran, kisoi l’idrozène, kisoi d’ot kalité l’énèrzi i sort dan la mèr, dann l’èr, dann fin fon la tèr... Epi fé an sort sé in l’énèrzi lé dirab, i épuiz pa épi lé prop pou lanvironeman.
Sé sa k’i konte : fransh vérité !

 Justin