Matante Zélida la ékrir Justin :
Mon shèr nové, mon spès salté,
Mi pé dir aou, moin té kontan kan Huguette Bello la difiz azot, bann rouj-de-fon, dann télé. A ! Moin lété kontan pou vréman. Pou kosa ? Pars, an promyé, moin la konprann madam Bello, mèm si èl la fé in gran bout shomin avèk bann rouj, èl la fini par désid kas la kord èk la diréksyon lo PCR. Fransh vérité ! Pti kou d’dan, pti kou d’dan, èl la fini par koup la kord mèm si té gro. Si mi konpran bien, èl la désid koup la kord pou in bonpé rézon, pars la pa promyé foi èl i di èl lé pa dakor, é so kou isi, i vé koup son tèt dépité La Rényon. Moin pèrsonèl, son déviraz lo do, sa in n’afèr mi aprésyé bokou... pars bann rouj-de-fon, moin la zamé gingn manz in grinn sèl èk zot. Donk, moin lé bien kontan oir ti madam-la dévir lo do èk sa. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
I étone pa moin antannn aou dir in n’afèr konm sa. Sanm pou moin, ou na rézon dsi inn-dé poin, ou na tor dsi in poin prinsipal... Ou na rézon kan ou i di, la pa promyé kou d’kanif Huguette Bello i fé dan son kontra èk Parti kominis. Kansa é komansa ? Dann z’éléksyon dépité éropéin, èl la pa lèv lo pti doi pou Elie Hoareau. Dann z’éléksyon réjyonal, toulmoun i souvien son tourné-viré. Z’éléksyon Konsèy zénéral, èl la di, sa in majorité mi konbat. Z’éléksyon sénatèr, èl la pran son par pou pa fé pas Gélita Hoarau. Z’éléksyon Sint-Sizane, èl té pou madanm Pausé kont Gironcel. Shak foi èl la bat tanbour dann zournal la droite ; mi pans èl i doiz èt sinpatik pou ou, mon vyé matant… pa pou nou, bann Parti kominis rényoné.
L’èr-la, alon oir dan kosa ou na tor. Vi oi, la diréksyon la zamé vouli tyé Huguette konm dépité. Malgré son mank disipline, la propoz aèl alé soubat dann in sirkonskripsyon i sort Sin-Pol — dé kanton — i pas par Troi-Basin — in kanton — i sava ziska Sin-Lé — dé kanton — i mont par z’Aviron — in kanton — i pas l’Etan-Salé ziska Sin-Lui — dé kanton ankor. La done aèl konm dalon in ga konm Claude Hoareau, in gran konbatan. Arzout èk sa, la di aèl, tout lo parti va vanj sanm èl. Donk i pé pa di, san fé in gro mansonz, k’i vé tyé aèl konm dépité. La zis done aèl in gran konba pou améné. Sé sa la vérité é sa solman ; lo rès, sé la mantri !

Justin