Matante Zélida la ékrir Justin :
Mon shèr nové, mon spès salté,
Bon, moin la trouv in n’afèr moin lé sir va mète aou an kolèr. Parl fète, ou nana ankor tizane matrékèr ? Pars sa lé bon pou bann rouj de fon la gingn dépitasion. Ala sak moin nana pou di aou zordi : la lang na poin lo zo, sa lé bien vré ! Bin, trojour, kan té apré dir nora travay pou kékzané dann batiman, sansa pou fé la route, in pé la bate la min ; ou lé dakor sanm moin ? Mé zordi k’i mank travay, moin lé sir i bate pi la min. Éstèr i di nora shomaj. Bin, par la fote kissa ? La fote bann gran prométèr, pti donèr... Alé, tok ! Pran sa pou toi !

Justin la fé aèl pou répons :
Mon vié matante, la pa zoli out kontantman kan nana pèr d’famiy an kantité lé riskab pèrd z’ot travay. Mé i fo oir kissa l’otèr : la pa la Réjion, vi k’sé èl i done ankor plis travay ké lé z’ot. Alor, kissa la fote si la pa bann marshann parol sak la di zot i fé pi bann gro shantié, zot lavé di zot nora fé. La pa Tampon la siprime in gran shantié, la pa Sinni la siprime kèk gran shantié. La pa moin k’i fo gaskoné, sé bann marshann parol k’i fo ral déssi shové ; la pa sak lété korèk k’i fo kritiké, sé dovan la port lé z’ot k’i fo alé bate tanbour. Sa lé konm lékol, sé sak i travay pa k’i gingn zéro, sak i travay bien, i mérite in bon note !
Lé konm sa é pa otroman !

Justin