In tan té l’tan gro-frode, le tan té i bour l’irn. Konm di lo kont, té i mète zèf poul a kouvé épi ti kanar té i éklo. Tan-la la fini, mi éspèr li arvyndra pi, mé tansyon : « I fo pa donn lo shat pou vèy sosiss ! ». Mé lo tan la manipilasyon, sète-la lé pa fini, é kan ou i trouv in l’aparèy d’Éta pou apiy sa, ou lé pri dan la kol jak. Dann bann manipilasyon-la, bann télé, déssèrtin radyo, épi bann gran zournal, la Droite i zoué in gran rol, pars zot i aplik in gran prinsip, in prinsip demoune san prinsip : pènn de moun kout korona, sharj de lo, kalkil mantèr, épi arkomans toultan la mèm shoz ziskatan k’lo mansonz i arsanm la vérité.
Pou kossa mi di sa ? Pars in bann lékspèr* i sorte étidyé bann pri La Rényon, épi alé konprann pou kossa, toudinkou, ala k’zot i mète a krétik loktroi d’mèr san krétiké pou vréman… pars zot i rokoné la pa sa k’i ésplik pou kossa la vi lé plis sinkante pou san pli shèr issi ké dan La Frans. Mé bann zabityé la manipilasyon i trouv z’ot soso la-dan : ala k’zot i di k’i fo siprime loktroi d’mèr. Ala zot i tard ar pa pou dir linpo lokal i pèrs demoun konm i pèrs in frui pou tir lo ji. Ala ankor ké sa i done azot grénade péi pou anvoy déssi la piramide tète-an-ba.
Solman, la vérité-la, sa i intérèss pa zot : zot i di pa dann bidjé d’in komine nana troi parti : l’inpo lokal, la dotasyon finansman é loktroi d’mèr. Si i tir sa, l’Éta va konpansé ? Va done in tyèr larzan an plis pou konpans sak la pèrd… kissa k’i pran ankor zanfan bondyé pou kanar sovaz ? Epi bann lantropriz La Rényon, si zot la poin in défans, koman zot va fèr ? Nout dépité Elie Hoareau i sort rant dann volan sak la parti sign in APE avèk Moris, Madégaskar, Sésèl épi Zimbawe san k’ni gingn di nout dé mo pou défann a nou. Alor, oussa i lé bann manipilatèr ? Zot i dovré bate la min ! Pars sa lé dan z’ot lozik sa. Lo pri va béssé é nout lékonomi va krèv la boush rouvèr. Konm di la shanson : sé sak lé bon, mé z’ami, sé sak lé bon !

* lin rapor lotorité la konkurans

Justin

Lésplikassyon inn-dé pti mo :

Bour l’irn : i di galman fé akoush la momon koshon.

I done pa lo shate pou vèy sossis : i donn pa lo shate pou vèy dé lé.

Pèrsé : pèrs linz, pèrs bann frui (citron pressé : sitron pèrsé).

Grénade péi : galé... grénade péi kont grénade lakrimozène.

Gingn son soso : gingn son manzé (mi éspèr zot i koné ankor soso mayi, sansa soso dé ri).

Rant dann volan : dispité, fé in romark, krétiké.