Zot i koné lo péi i apèl Népal ? Mi pans ke oui. Zot i koné son kapital, Katmandou ? Moin lé sir zot i koné. Ousa sa lé ? Pa loinn La Rényon vi ke par in koté li toush la Chine, par in koté li toush l’Inn. Donk sa in péi l’oséan Indien, konm nou mèm, konm Madégaskar épi lé zot péi ni koné bien... si pa an vré, nou la fine oir omoins lo non dann liv Zéografi. An plis ké sa, figir azot an parmi lo dis pli gran piton nana dsi la tèr, na uit i tonm dsi son téritoir é nana in bann gran flèv i pran zot sours dsi son téritoir.

Mi pans in pé rant zot i doi komans révé mé i fo kant mèm zot i koné lo péi lé pov : troi san karant dolar par an épi par pèrsone. Arzout èk sa, dann son bann montagn nana in kantité lak i provien par la font bann glasyé é an parmi lo bann lak, nana vinn-kat lé danzéré, pars si zot baraj la tèr, galé la glas i kass ébin sé la katastrof pou lo péi. An pliské sa lo bann lak i grandi zour an zour épi bann baraj lé ménasé.

Pou kosa ? Lé bien posib sé par l’éshofman klimatik. Mé zot va di amoin : na poin in manyèr pou protèz bann zabitan ? Bone késtyon, nana ! I fo krèz bann kanal pou fé bès lo nivo d’lo bann lak, mé sa i kout shèr : i fo kont troi milyonn dolar par lak é konm moin la di azot lo péi lé pov. Mé lé moin shèr k’alé fé la gèr l’Irak, l’Afganistan, lo Mali épi d’ot koté ankor. Mé lo Népal la pa in péi danzéré épi i ansèrv de koi èd in péi li lé mèm pa ménasan. Di amoin zot !

Moin la antann in gran shèrpa*. Lo boug té i di konmsa, bann péi rish la bézoin léstrésité, la klim, loto l’aviyon mé zot, zot la poin tousala, mé sé zot i siport lo konsékans. Sé touzour bann pov ki pèy déga dé rish.

* Nana 65 pèp dann péi-la é an parmi bann Shèrpa. Banna lé for konm gid dan la montagn, pou transport bann paké soisant kilo dsi zot do, pou lo komèrs. Banna lé romarkab pou zot kapasité. Mé malorozman zot i viv dann in péi bien ménasé.

Justin