I diré, koméla La Rényon, dann tout z’afèr, lé pli préférab pa oir pli loin ké lo bout son né. I pé di ossi : « Kan lo moun saz i amontr la line, lo moun kouyon i rogard lo doi ! », é dann lo trikmardaz dési l’éstrésité, sé konm sa k’i fé... Kan bann travayèr Boi Rouj épi le Gol la réklame in sir-réminérasyon konm bann fonksyonèr nana déza, la plipar d’moun moin la antann dann radio pèrkal la mète a kriyé. La di sé in éskandal, kan i oi tousa bann ti-kolon o-flan nana La Rényon. Plis la moityé d’moun dosou lo sèy la mizèr, sa in éskandal pou vréman !

Mé kan bann travayèr la di dépi in paké d’zané l’apré raz azot la pinte pars i vé pa aplik bann tèks de loi, la pa bate tanbour la-dsi. Pou kosa ? Pars mi pans lé pli fasil tape dési la tète bann ti-kolon ké dési sète l’EDF épi la Séchilienne-Sidec. Lé pli fasil dir bann sindika, sansa bann travayèr l’apré prann an otaz bann konsomatèr ke dénons in n’ot l’éskandal. Fransh vérité ! Koman in privé porte-moné bien garni épi l’EDF épi l’Etat la vyol la loi dépi si tan tèlmann tan ? San kass la tète ! La konsyans trankil, la min dsi lo kèr !

Pli pir, koman i pé lèss in n’afèr inportan konm l’énèrji dan la min in kapitalis privé mèm konplis avèk in kapitalis moin-z’an moin-piblik épi l’Etat-UMP ? Mazine in kou, si demin la Séchilienne-Sidec i déside mète la klé sou la porte pars i gingn pi son gro moné. Mazine in kou, toudinkou La Rényon nana soisant pou san léstrésité an moin pars in privé la déside tak baro. Sa i pé arivé, pars la pa l’intéré bann Rényoné lé inportan pou in pé. Sak i kont, sé gonf lo pla bann kapitalis ninport-ékèl manyèr. Pars, inn konm l’ote, plizanpli lé parèy. Blan boné épi boné blan ! Topète pou morète !

Justin