Si i domann azot kisa la di sa, moin lé sir zot va di Voltaire, sansa Napoléon. Alé oir sé in roi i apèl Antigone 2 la di sa lontan avan banna. Si mi di azot Antigone 2 zot va di amoin avèk juste rézon, Antigone té i rèv pa marsh kat pate kan d’ot la di sa. Fransh vérité souvan défoi i fo méfyé son prop z’ami, pars li mèm lé riskab fé annuir aou. Antansyon mi vé pa anparl lo fo zami-zènmi l’intèryèr-sak i apè lo sinkyèm kolone - pars li di pa zamé li sé out zami, mé li fé konmsi alé oir non. La vi lé insi fète ké désèrtin i suiv in bi é la pa toulmoun dann mèm kan i suiv mèm bi. Ala sak i fé lo konba sé in n’afèr konpliké, é la guèr inn’afèr bien difisil. Défoi i anparl bann règlomann kont, mé koman i fé kan in pé i koup an dsou. Alé mi arète la, mé mi domann azot bien rofléshi la dsi é ni artrouv pli d’van. Sipétadyé !