Oté

Sékirité alimantèr ? Dakor, mil foi ! Mé san siprime nout kann-morso 2

Justin / 10 novanm 2020

JPEG - 43.6 ko

Mézami, moin lé sir mon lartik dsi la sékirité alimantèr la pass yèr lé possib la shoke in pé pars zot i pans kann néna poind l’avnir issi La Rényon. Koman ni sava fé pou rant an konkirans avèk bann gro prodiktèr kann konm Brésil ; Thaïland, l’Indonésie é d’ot é d’ot… nou k’lé pa pli gro k’in poin dsi la kart. Zamé nou va gingn rant an konkirans avèk lé zot ! Zot i koné si i komans konmsa issi La Rényon, ni gingn ar pa fé arien sof assir dsi in rosh piké pou shof solèye. sé sa ké ni vé ? Mi pans pa ! donk i vo myé di :"Nou lé kapab !

Fransh vérité mézami, dann tout zafèr néna in bann rishèss é sa sé nout matyèr griz k’i sava rodé é lo rényoné lé kant mèm pa in zéro la gosh in shif pou kapitil san bataye, pou pa alé rode lé shoz ousa zot i lé ? Aprésa in n’afèr i doi ète klèr dann nout tète, sanm pou moin, sé ké ni doi pran kann konm in produi prop, kaziman in produi bio, san poizon pou mète ali an valèr. I fo ni konsidèr galman kann dann son proksimité é an bazan la dsi ni pé mète an gard avèk lé zot.

Kosa ni pé dir ? La mèm shoz nout zoinal Témoignages i di dopi dé tan é dé tan. Dann kann néna do sik biensir mé néna galman plizyèr santène sou-produi, sansa ko-produi : fitintan nout zoinal té anparl sink san produi i pé ansèrv si i shoizi bien é si i mète bien an valèr, i pé fé rant nout péi é d’ot dann lékonmi d’prodiksyon modèrn... a inn kondisyon sé d’kass la konvansyon Virapoullé Fédécanne l’ané 1967.

In sèrtin tan la shanm l’agrikiltir l’avé in doktrine téi di konmsa : kann sé lo promyé moiyin pou La Rényon ariv dann in lékonomi divèrsifié. Moin pou ma par mi oi sa sirtou konm kolonn vèrtébral nout fitir lékonmi dévlopé. Zot i souvien dan la bib i parl in moun la vann son léritaz pou in pla lantiy, ébin kossa nou la fé nou avèk nout savoir fèr, nout lékspèryans ramassé zénérasyon apré zénérasyon, nout konésans syantifik, nout konésans pou fabrik bann varyété kann…… Mé mézami, sa té avan-yèr, té yèr, zordi mé domin i pé z’ète in n’ot zour. Zot i pans pa ?