Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité,zordi mi sava dir aou in n’afèr moin lé sir sa i sava pa fé plézir aou, mé konm i di : « La vérité sé la vérité, é li néna l a koulèr la vérité ! ».

Zot i vé, zot i vé pa, lé konmsa é pa otroman. Oila sak mi sava dir aou : vi rapèl lo Cospar ?In plan monté pou fé bèss lo pri bann marshandiz é pou goumant lo pouvoir d’asha.Vi rapèl bien sa, é vi ansouvien sé mésyé Holland la done sa kaziman son kou d’gras kan li la siprime lo prime Cospar.

Astèr moin lé sir zot té kontan kan bann zilé zone la ardone favèr son réklamasyon pou in pli bon pouvoir d’asha.Mé élas, élas, élas troi foi, d’apré sak i di, bann pri la goumanté é bann rovni la diminyé.Mi domann amoin si bann rouj-de-fon lo PCR i sava ankor zordi ankèss lo patèrnité d’in plan la done in rézilta konmsa.Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr mi rokoné bien dann sak ou i ékri, out léspri tordi.Dabor pars d’apré sak ou i di sé par la fote bann manifèstan si lo pouvoir d’asha bann travayèr pov, bann rotrété, épi tout bann moun dann malizé, la diminyé.Mi rokoné bien la-dan la politik gouvèrnman apré souf dann zorèye demoun : révolté épi rézisté i ansèrv de rien ! Fé konfyans la politik Macron é zot va oir zot sityasyon va amélyoré firamézir.

Matant, m’a dir aou franshman, la pa an lésan bann kapitalis fèr ké ou i pé amélyor lé shoz pou bann travayèr pov, épi bann rotrété é bann moun lé blizé viv avèk l’ède sosyal. Mé néna in n’afèr danzéré dann sak ou i di ! Si gouvèrnman i vé fé konprann bann moun dann malizé zot néna intéré pa réklamé,-prèv par lo dimin isyonn pouvoir d’asha !- mi trouv sa lé danzéré si sé lo plan gouvèrnman avèk sète bann kapitalis.Zoué avèk dofé é ou va bril out doi !Zoué avèk lof é é ou va piss o li !In sinp zétinsèl i pé mète dofé dann la plène !

Alor matant in zé danzéré i fo pa zoué ali.In mové propagann i fo pa fé ali !Provok bann moun dann malizé é ou va touv ali dsi zot pasaz ! Sème kou d’van épi ou va rams siklone ! Tok, pran sa pou ou !

Justin