Fitintan bonpé d’moune téi panss la lang kréol téi doi disparète pars li té an konkiranss avèk lo franssé épi toute bann média é galman lansègnman té i fé dann la lang bann franssé. Konm lo franssé l’avé toute bann moiyin pou li, forssé pa zordi pa domin lo kréol téi doi disparète.

Mi rapèl in vice-réktèr téi di : mon granpèr avèk mon granmèr téi koz an provanssal é pa an franssé, mon bann paran téi konpran lo provanssal mé téi koz franssé. Kan l’ariv mon tour mi konpran pi lo provanssal, é mi parl franssé. Aprésa li téi di, déstin kréol lé parèye, pa zordi pa domin li va disparète.

Mézami li téi di sa dann bann zané 1970-1980 é sa i rann amwin triste, pars si lé vré, wala in moune la pa koz avèk son bann gran-paran é mi plin ali, konm étan mwin mèm granpèr mi plègn granpèr-la é fransh vérité mi domann amwin koman la kiltir familial la fé pou pass zénérassion an zénérassion. Mi plègn bann ti zanfan pou lo mank léssassyèl dann la rolassion avèk zot gran paran.

Lo tan la passé é mi sorte garde in statistik i di konmsa 80 % d’moune La Rényon i « métriz » lo kréol rényoné. Donk nou lé lwin d’sak lo fo-profète de viss-réktèr téi di é pou bann moune konm mwin sé in rézilta mi apréssyé. Mé mi domann an mwin mèm kèl par mon zénérassion la pran ladan pou trape in rézilta konm sète la.

Dann lo statistik i di, an parmi bann jenn, néna solman 73 % i métriz lo kréol. Sa i vé dir kossa ? Sa i vé dir lo pourssantaz rényoné i koz kréol va diminyé ? Fransh vérité mézami alon arète trass bann plan dsi la komète pars ni koné sak i di sa nora tou fo.

Promi ziré ké zot nora tou fo !

Finalman kèl sar laplass lo kréol an parmi noute popilassion ? Sirman sa i dépan la politik kiltirèl épi linguistike ofisyèl, mé sa va dépann sak nou va fé an maronaz, épi la plass nou va done lo kréol dann nou mèm, dann ladministrassion, dan lékol, dann la mizik, la kiltir donk néna a voir.

Sé pou sa mi sava pa dir kèl sar lavnir lo kréol inn foi ma vi sar fine bakil l’ote koté mé konm mwin lé optimist mi di la plass noute kréol ? Lo pliss plass possib, Lo méyèr plass possib.

A bon antandèr salu !

Justin