Mi rapèl bien bande déba nou la fé dsi lotonomi kan sa lété a l’orde di zour é ké nou téi lité pou sa. Donk nou téi lite pou noute doub libérassion : inn té la libérassion sossyal, l’ote lété pou noute libérassion anti kolonyal. Zot i koné bataye-la sa nou la pa gagné si tèlman ké nou la pa gingn noute doub libérassion.

Mé oila in pé i porte la fote dsi lotonomi. Zot i di si nou l’avé vanj pou lindépandanss noré té san foi méyèr... Astèr mi yèmré k’i di amwin si toute péi indépandan zot la libère azot la dominassion néo-kolonyal. Par ébzanp mi yèmré k’i réponde mon késtyon dsi lo fran CFA : si par égzanp lo fran CFA la rande in gran sèrvis bande zansyène koloni ou sansa non ?

Ni pouré in zour fé in sobatkoz la dsi, mé mwin lé sirésèrtin in bonpé péi indépandan - lété sou la koupe La Franss avan — zot lé pa vréman dékolonizé. Konm nou, nou lé pa dékolonizé. Mé antanssyon sa sé in n’afèr i amènré anou loin. Pa pou zordi biensir mé dann l’avnir sa lé siréssèrtin.

Boudikonte nout doub librassion sa sé kékshoz téi fo anou, é téi fo ossi bande zansiene koloni, mé konm zot i koné lo tan la pa tro shanjé pars boudikonte li la rèss parèye-a popré.

A bon antandèr, salu.

Justin