Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité,

Mi domann amoin si zot i kroi vréman lé posib anbar la mizèr. Dé foi mèm si zot i vé vréman konbat la mizèr. Pars, sanm pou moin, désèrtin i prétan dir zot i konbat la mizèr, mé fransh vérité, zot i vé tiliz zot konba pou fé zot shomin dan la politik. Mi sit pa lo nom, mé i sifi suiv in pé l’aktyalité pou oir kisa i fé sa pou sa, é kisa i fé pa sa pou sa. Dé foi zot i di, zot konba dan la politik i suiv zot konba kont la mizèr. Dé foi zot i di sa, mé konm di lo kont, la pa in vyé sinz konm moin i aprann fé la grimas. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

Si mi suiv aou bien, an parmi sak i konbat la mizèr, na dé kalité d’moun : sak i kroi lé posib kal la mizèr, mé zot lé an tor pars lé pa posib, épi sak i koné bien lé pa posib épi sa sé zot fonn komèrs pou la politik.

Dan lo promyé ka, mi pans ou na poin rézon. Pou kosa ? Pars m’a dir aou franshman, nana solisyon pou tir anou dann fénoir. Moin lé sir é sèrtin ni pé trap nout otosifizans alimantèr, nout l’otonomi dan l’énèrji, ni pé dévlop dé gran sèrvis, dan la proksimité, épi dan l’anvironman, ni pé dévlop la pèsh é tout sak mi di toultan. Donk ni pé dévlop l’anploi, é bien konm k’i fo... Arzout èk sa, dan la shart l’Ermitaj, nana in takon mézir pou tir in kantité d’moun dann fénoir.

Dan lo dézyèm ka, sak ou i di i rann amoin tris pars kan mi rod la solidarité, ou i réponn amoin par l’intéré, kan i parl séryé, ou i réponn amoin la malonètté. Kan i parl in l’anbisyon pou nout pèp, ou i parl amoin l’anbisyon bann shoviy gonflé. Mi pans lo pèp rényoné va konèt fé lo triyaz, konm i di dan la Bib, sépar lo bon grin avèk l’ivré… tienbo inn, zèt l’ot dann fé pou brilé. Tok ! Pran sa pou ou !

Justin