Konm mi antan dir, konm si lo prézidan i vé rosharz si lo mar i di. Li minm, ni pé pa di k’li lé tro kozan la d’si mé tanzaot li anvoy fé di par son lantouraz. Dawar pou tat lo térin, li fé konm domoun i yinm fé flatt a zot, mi rovyin, ma war, pou lèr mi tat a mwin, shomaz i riskab èt in frin pou mwin, si i bèss proférabloman pou mwin lé plis mié tousala mé finn kont mon lidé a mwin li lé déza kandida pou 2017. Mé kandida pou fé koué ?

Débi 2012 domoun la Rènyon té an pé pi, domoun té i voulé in shanzman pou vréman. Izé èk in gouvérnman razèr d’pint, èk in prézidan i prétan dir ki té i fé aryink pou moun rish. La d’si lo prézidan aktièl la promi a nou la ba sin lui “lo sanzman sé pou zordi“ konm li la prézant a nou son program, èk inn dé poto anndan, lo tram-trin, lotonomi énérzétik, lotosifizans alimantèr, sifizaman pou ral a nou dann fo trin si mi pé di.

Boudikont Rènyoné la vot an poundiak pou li, zamé in prézidan la gingn tanksa d’vwa isi la Rényon. Zordi kossa i rèt ? Ni pé pa di zordi ké tout lé pérdi davanss, mé konm i di, sha shodé i krin lo frèsh é pi minm si ni koné la pa touzour fasil, pétèt larzan la manké ? Pétèt navé dot priorité ? Mé pou sa li dwa rann a nou kont, é pi konm di mon vié matant lonékté té fé avan nou, sérèss inn ti bonzour li pé di a nou !