Sèrpan la pa di pliss, mé Gronouy i vé savoir,
Kan li shanj de po sé lo matin sansa lo soir,
Pou koué li bouze la ké, pou koué li tir la lang,
Pou kossa ankor son kor san arêté i tranm.

Sèrpan la trouv kozman gronouy té indéssan,
Li la arvir dsi l’ote épi li la domann,
Madanm la késtyonèz, pétète ou i pé di-amoin,
Po kossa out dé zyé dsi out tète lé anlèr

É out guèl lé rouvèr a la minite a l’ èr toultan.
Wi pé dir amoin kossa sa i ansèrv aforstan,
Gronouy la réponde sé pars èl sé in gronouy bon kalité,
É èl lé okipé fé pass méssaz in pé partou san arété.

Mé sèrpan avèk sa lété pa tro kontan,
Li la dmann kèl sé siouplé di ali son lanploi di tan
Gronouy la fé pou répons, lo zour, la nuite, toultan,
Mi domande kissa ki vala, kissa ki lé, kossa k’i vé

Sèrpan la fé pou réponss : A bon ! Madam la késtyonèz,
Wi domann kissa mi lé, ébin m’a réponde aou a l’èz,
San tardé sé d’trap Gronouy sé d’anvalé é dopi tan-la
lé shoz i éspass pa otroman :
Pi d’réspé, pi d’pardon ! anvalé sé la shanson !

Fab péi malagashi Tradui par Justin