Dabor mi doi dire azot landroi lékol Boid’Nèf lé pa la porte a koté par raporte lo léprèv téi pass dann fon La rivière Sin-Dni. Landroi-la l’avé in pissine épi in térin léspor. Sé landroi in pé la fé lo gayar, mé sé landroi galman déssèrtin la pèrde zot zilizyon.

Kriké ! Kraké ! Kriké Méssyé ! Kraké Madame !

Donk lété fine pass toute bande zéprèv a l’ékri. Té fine done rézilta : sak l’avé pa gagné l’avé pa gagné ! Sak l’avé gagné l’avé gagné. Astèr téi fo pass léprèv shanté patriotik – sink o shoi – épi pass lo léprèv léspor.

Bande garsson l’avé mète zot short droite é bande fiye zot short boufante avèk in lélastik téi antour la kuiss. Bande garsson téi pé fé konkour touni par an-o, mé bande fiye téi doi mète in korssaz an koulère.

Yéyèle pars lété konmsa toute marmaye éi apèl aèl lété in fiye assé doué pou bande matyèr prinssipal, épi pou lo shan, la réssitassion, mé pa si tèlman doué pou léspor. Poitan èl l’avé antréné é lo promyé garsson la Diréktriss-mon momon par l’fète – l’avé dress kabaré toute zinstalassion téi fo pou in bon lantrènman.

Lélastik avèk in foss la sab pou so an otèr. La boul karoutchou pou lanssé. La korde pou grinpé – in bèl kord pandiyé dsi léshafodaz la sal de klass. Téi anroul anlèr kan l’avépwin lantrènman, téi larg rante lo ban kan bande kandida téi antrènn.

Donk a la léprèv léspor é ala lo kapab Yéyèle dann légzèrsis-la. Pou la otèr, koman koman, èl la vnyabou pass lo 90 santimète téi fo passé. Pou la korde la nyabou dékolé-la fess té tro lour é lob ra l’avé pwin lénèrzi. la ziss dékolé é lo zisze lo rézilta, la marrke : « Bon pou sa même ! »

Astèr lo lanssé d’la boul. La téi fé pété. Antouléka sé la konsign mon papa – lo mari la diréktriss – la done son poulin, son poulin k’té inn pouline par l’fète.

Lo tour Yéyèle l’arivé. Promyé éssé, la boul la tonb pa tro loin, sink-sis mète parla. Dézyème léssé : la fé parèye, pa pliss, mé pa mwin… Mon papa la di avèk in linstititère koté li, téi apèl ali méssyé lo diréktèr, mi koné pa pou kossa… Antouléka li la di : troizyème léssé malère !

Toute demoune té fine fé zot éprèv é sé pou sa spéktatère téi manke pa i diré sa la éstimile in pé la kandidate. El la pran in lélan, la kal in kou, la zanbe la lévé, lo bra la parti an aryèr. Malère ! Toute spéktatèr la rogarde dovan, mé la pa vi arien. La rogarde Yéyèle, l’avé pi arien dann son min. La rogarde déyèr, in pti boul rouze téi roule anpityé dann zèrb.

In rire zénéral la sokouye léstoma bande léspéktatèr. Yéyèl lété bon pou rante dsou la tère. Lo linstititère – in zalou mi pans – la di avèk sak li téi apèl diréktèr : « Malère Méssyé lo diréktèr ! »

Mon zistoir lé fini. La kandidate noute lékol la gingn son diplôme pars l’avé bonpé d’ote léprèv an pliss léprèv léspor. Mon papa la di avèk son shanpyone : « Monte déryèr mon moto ! » épi son lékipaze la disparu dann in nyaze la poussyère mé li la gingn kante même in pé zaplodisman mérité.

Koton mayi i koul ! Rosh i flote ! L’avé inn foi pou inn bone foi, méssyé lo foi la manze son foi avèk in grin d’sèl.

Justin