Matante Zélida la ékrir Justin :

Mon shèr nové, mon spès salté, rouj-de-fon dovan léternité,

M’a dir aou, franshman, nana dé zafèr mi konpran pa èk zot, mèm plizyèr zafèr, mé zordi na inn l’apré fatig amoin. Ou i doi oir apépré, sansa ou i vé mi mèt lo poin d’si lo “i” ? Bin ala ! I diré an ékoutan azot, zot la pa konm toulmoun. D’apré zot, in pé i amèn in zé pèrsonèl, sansa i rod zot zintéré, é zot non. Zot, si i kroi zot kozman, zot i rod aryink lo bon avnir po lo pèp rényoné. Alé oir non ! L’om sé l’om, lo moun lé konm sa é pa otroman. An promyé, zot i pans a zot : zot i vé èt kandida, pou èt élu, pou fé valoir azot, é pétèt galman défann zot zintéré... donk, gonf zot pla. Aprésa, i fo fé in program, lo méyèr posib, lo pli vit posib, konm sa demoun i trouv in rézon pou vot pou zot. Dan tout parti, lé konm sa ! Pou koué an avoir ont ? Sa lé dan la natir imèn é, touléka, la pa in bougrès konm moin zot va fé pran po d’shanm pou pla kouvèr, makaroni pou la bouji. Tok ! Pran sa pou toi !

Justin la fé pou répons :

Mon vyé matant ki koz touzour la boush rouvèr,

Out kozman i étone pa moin di tou. Kan ni di, pou èt kandida dann in zéléksyon, i fo pans avan tout lintéré La Rényon, lintéré son pèp, sa lé mal konpri. Kan ni di, i fo pa lo kandida i pans son lintéré avan tou, son lanbisyon avan tou, sa lé mal konpri. Myé k’sa, na demoun va dir, si in moun lé kandida, sé pars li na in kèkshoz pou li gagné : alé oir, dé foi lé vré, é shak foi na in moun lé élu, sé in n’afèr ké ni oi. Mèm demoun té d’si in list apiyé par nout parti. Apré zéléksyon 2008, nou la vi dé shoz konm sa, é mèm in pé la kit nout parti pars zot i pans sar pli fasil èt élu san li. An mèm tan, désèrtin la gonf zot pla é zot kont an bank. Dakor, sa sé in n’afèr larivé, sa sé in n’afèr lé riskab arivé ankor, mé i vo myé mèt an gard plito ké ankourajé. Ala pou kosa kan nout parti i fé in règloman, sé pou amèn in pé la moral dan la politik, é lo promyé règ moral, sé sèrvir lo pèp é pa sèrv son zintéré d’si lo do lo pèp. Tok ! Pran sa pou ou ! 

Justin