Médam, Mésyé, La Sosyété koz èk moin sé koz èk in kouyon mé sé o pyé d’lo mir k’i oi lo mason. Zot i koné dann tan, kréol té i yèm larg lo shien kou d’rosh. Kisoi par méshansté ! Kisoi par malis ! Kisoi ankor par sé fout pa kèl santiman. Mé téi pé arivé nou téi fé sa san rofléshir pars in kou d’galé lé vite parti épi vite arivé. Dann sé kondisyon nou téi kalkil pa lo konsékans é lo konsékans téi pé dépass lo zèss anvoye galé. Si l’propriyétèr lété mové mi promète azot té i falé pi rokomansé. Si out famiy té an afèr av èk li ala do koi fé kapote l’afèr. An touléka, sak lé sir sé ki fo avan fé in n’afèr ou i kalkil lé konsékans é sé sa ké o kozman i vé dir anou. Alé ! Mi kite azot rofléshi la dsi é ni artrouv pli d’van. Sipétadyé