Listoir la dsi lé pa tro klèr : ni koné sa la spassé kan Maurice té apré négossyé avèk la Grande Bretagne pou gingn son lindépandanss-l’ané 1965 si mi tronp pa.. Dann tan-la Maurice l’avé Ramgoolam konm roprézantan lo pli inportan é Langlétèr son promyé miniss lété Harold Wilson. Ramgoolam téi vé z’ète lo papa lindépandanss son péi é Wilson téi vé absoliman donn satisfakssion Zétazini…

Kissa la désside fé alé toute bann shagossien ? Pa Maurice biensir é mèm i paré la zamé domann son avi ni son konssantman. Langlétèr ? Sirman mé an konplissité avèk Zétazini, par l’fète sak téi désside. Mi oi plito GB konm in valé téi vé kontante son mète.

Antouléka ni koné la suite, ni koné bann konsékanss é sirtou ké lil Maurice lété privé inn parti son téritoir é bann shagossien la trouv azot éparpiyé dann péi étranzé dann la mizèr épi labandon nou la fine anparlé.

Dann tan-la Olivier lété Maurice. Li l’avé vni avèk son papa, son momon épi son pti sèr — lo pti sèr l’avé vni pou fé soign aèl — in rou d’sharète l’avé pass dsi son pyé… mé lo soin la pa ansèrv arien é lo pti sèr lé mor. Mé kan la famiye la vouli rotourn Shagoss bann zotorité la di non : Shagos lé fèrmé.

Olivier lété pti é li oi son momon apré pléré é li domann kossa i fé plèr aèl. Lo momon i réponn lé défandi rotourn dann Shagoss. L’èr-la Olivier i di : « In zour m’a koz avèk méssyé blan-la ». Sé konmsa k’inn vi antyèr angajé dann la défanss son péi épi son pèp la komanssé é li kontinyé zordi ankor.

A bon antandèr salu !

Justin