Yèr mwin la domann Olivier Bancoult kèl distanss néna rante Salomon épi Diégo : li la réponn amwin 680 km par-la. Mwin la domann ali konbien distanss néna rante Diégo épi Peros banos, li la réponn amwin a popré la distanss rante Maurice épi La Rénion.

Astèr mwin la anparl ali Guam — baz lamérik si demoune i rèst loin la baz : li la réponn amwin la kaz demoune i ariv ziska lantouraz — é pou Guantanamo li la di bann kubin i rèst pa tro loin la baz… Astèr mwin la domann ali in lésplikassion dsi lo vidaz demoune dann Salomon épi Peros, li la di amwin bann zamérikin la pèr bann zatanta téroriss é sa la bien étone amwin.

Li la di amwin ankor bann GB l’avé pèr bann shagossien i domann zot lotodéterminassion ; donk 2000 pèrsone i pé fé pèr dé grann puissans alé oir lamérik néna baz militèr in pé partou é kan zot i vé pa tir zot baz pèrsone i gingn komann azot… Pèrsone sof dé mil shagossien ! alé marshé don ! Kissa i pé kroir in n’afèr konmsa ?

Mézami mi domann azot si néna in rézon valab ladan, si néna in lésplikasskion rassyonèl ? Biensir ké non. Si tèlman ké zordi GB avèk lakor bann Zétazini i propoz bann morissien ropran souvrèneté dsi Shagos, avèk la possibilité alé abite dann Salomon-Bodam épi Peros Banos é mèm alé bate karé dann Diégo.

Alor sak lété danzéré dann tan i vien banal zordi alé oir néna bann zarm minyatirizé i pé pèrmète si néna téroriss zot i bonbarde la baz militèr konm sa i éspass dann moiyin oryan. Ni oi bien sa i tienbo pa d’boute é sé zistérézon ké bann shagossien i pé domann in vré réparassion i mérite azot apré toussa tourman zot la ankéssé.

A bon antandèr salu !

Justin