La lite-la lété difissil malgré zot néna rézon san pour san, malgré bande grande puissans téi pass zot tan pou viol lo droi internassyonal é zot l’avé tor san pour san mé malgré sa bande tribinal téi arète pad one azot rézon.

Opliss lo tan téi pass, opliss bande shagossien lété dann la dézilizyon, opliss mi pans in fraz moin la lir kékpar é i di konmsa : « Lo bi sé d’done azot la frouss par kou d’léspoir » é mi panss sé konmsa mèm bande zanglé i fé dopi sinkantan an léssan azot éspère zot rotour. A kou d’léspoir, a kou dézilizyon, a kou d’léspoir ankor é a kou d’dézilizyon ziskatan zot i pèrde léspoir définitivman.

Sa i rapèl amwin l’ané 2016 kan gouvèrnman bande zanglé la lèss bande shagossien kroir zot i alé rotourn shé zot pou finalman dékouraz banna an déssidan téi falé pa konte rotourn shé zot… a bien oir in lérèr san pour san kan ni koné sak la s’pass aprésa dovan la kour internassyonal la Haye épi ankor dovan l’Onu. Mé listoir té apré akséléré, Royaume uni plizanpliss izolé, la rène mor épi in roi san préstij é san l’otorité, troi gouvernman inn apré l’ote dann in mèm ané épi finalman lintanssion assiz a la tab négossyassion avèk gouvèrnman morissien.

So kou issi avèk in vré léspoir pou bande shagossien, sak i vé, rotourn viv dann zot péi épi rokonstrui zot archipèl.

A bon antandèr, salu !

Justin

NB Mézami lundi 9 zanvier Philippe sands i vien fé in gran konférans dann l’inivèrsité La Rényon — Sindni… é zinvité d’onèr sar la avèk li : Olivier Bancoult résponasab bande shagossien an lite, épi Lisbye Elizé gran témoin dann tribinal la Haye épi sitoiyène d’onèr la vil de Lyon.