Médam zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami si mi di azot mi yème pa kozman-la, zot lé riskab dir Justin i di sak li vé, mé ni oi pa kossa li trouv pou dir an mal dsi provèrb-la. Finalman in momon i oi son zanfan avèk lo zyé d’lamour donk forséman pli zoli ké li lé an réalité. Mé na poin arien pou roprosh lo momon bourik.Konm noré poin arien pou roprosh in momon imène.

Justin, i fo pa oir lo mal l’androi li lé pa !

Mé voila, mon lédikassion i amontr amwin fèr antanssyon l’alyénassion.L’aliénassion ? sé prande aou pou kékshoz ou lé pa. Zanfan bourik sé bourik é mi panss in bourik i oi son zanfan pa konm in shoval mé konm in zoli bourik é sé sa k’lé inportan.

In rényoné sé in rényoné an promyé é sé sak li doi oir an li mèm an promyé dann son l’idantité é sirtou li évite pran ali pou sak li lé pa. Biensir lé posib son l’idantité néna plizyèr fassète mé dan toussa kan li panss son l’idantité d’péi, sansa son l’idantité d’téritoir, sé rényonèz li doi oir an promyé mèm si la pa sa ké lé marké dsi i son karte l’idantité ;

Alé ! mi kite azot rofléshi la dsi é ni rotrouv pli d’van. Sipétadyé.