Médam zé méssy, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami, mi panss aoir di azot lo kozman mwin la antande dan la boush in dalon sin-Lé dann tan li é mwin nou lété ankor jenn. Marmaye-la téi di : « Na poin krapo pou pa trouv son krapode »

Donk, sa i vé dir si la pa zordi, domin é si la pa domin sé apré, shakinn va trouv son kélk’in dan la vipou fèr inboute shomin ansanb- i di ossi son késkésé.

Alé ! Mi domande azot rofléshi la dsi mé obliye pa, i vo myé ète toussèl ké mal akonpagné. Dézolé si mi kass zot rèv mé artrouv kant mèm, sipétadyé.