Médame, méssyé, la sossyété koze èk mwin sé koze èk in kouyon mé sé o pyé d’lo mir k’i oi lo masson.

Mézami kozman mwin la mark an-o la, mi tire sa dann trézor provèrb noute bande kouzin Haïti é zot i pé ète sir dann péi-la néna in ta avèk in paké provèrb, kozman, patoi, zékspréssion pou di toute zafèr. Issi, ossi dann noute lang kréol La Rényon i anmanke pa. In korde néna dë boute, konm in pyèss néna dë koté ; si wi baze dsi inn wi konpran pa lo problème dann son totalité, si wi baze dsi lé dë lèr-la ou néna la shanss konprande in problème an antyé...

Lil Moriss la-ba i di toute shoz néna son bon épi son mové koté. Mwin l’avé in kamarade téi di souvan avan li pass lote koté la vi : in mal pou in bien é in bien pou in mal. Souvan dé foi, mwin téi domande ali :« In bien pou in bien na poin ? » ; li téi réponde amwin ! : « Sa i paré aou, mé a bien rogardé avèk lo tan ou va romarke ou la fé in l’érèr kékpar. ». Mézami, mi panss i fo bien kalkilé bande zafèr konmsa, bien réfléshir é sé sak mi lèss azot pou fèr.

An atandan, ni artrouv pli d’van. Sipétadyé.

NB : Toute kod gein dé boutte-Toute corde a deux bouts ; proverbe Haïtien.