In provèrb, kisoi kréol, kisoi in n’ot, i pé z’ète pri dann son sans, sansa a kontrosans, sansa i pé ansèrv dé li dann lé z’apépré. Donk na in madam lé konséyé zénéral l’alyans, aprésa èl la dévir son palto.

Parti kominis la propoz aèl in l’alyans pou lo zéléksyon k’i vien, èl la rofizé. Kan la dmann aèl pou kosa, èl la réponn « shak koshon na son samdi »… in samdi pou k’i tyé ali, sansa pou k’i fé son fète é dann in drol de sans. Alor, kosa èl té i vé dir ?

Kisa sé lo koshon dann zistoir-la ? Sé èl, sé lo parti kominis , kisa ankor lo PLR ? Anon atann pou oir. Sak va rès atèr domin, sansa apré domin, sar lo koshon mé dann in ka konmsa pétète sé in koshon nora fé son hara-kiri. Zot i koné kosa i lé ? Donk ki vivra véra é sak va viv va oir !